翻開早兩年既報紙，見到一個標題「80後孭卡數照豪使」
說真的，身為一個「背負大筆卡數」既80後，想係度向大家分享下我自己認為我人生中既悲劇。
年少無知既我，因為某年暑假既一次閒逛，結果導致我最近10年都背負既沉重卡數
我有時認為，呢件事係自作孽不可活
始終「牛唔飲水唔噤得牛頭低」，信用卡單上面簽名無人拎支搶指住你要你簽架喎，咁仲唔係自作孽？
其實都背負左咁多年大筆既卡數，入不敷支對我黎講已成習慣，但面對住年華老去（誇張XD），覺得儲錢係人生中其中一件大件事，呢筆「定期」既大支出對我黎講簡直係一個絆腳石。
講下背景先，暑假係街行，無啦啦有（疑似）暑期工走埋黎叫我填問卷喎，果陣天真爛漫既我覺得填張紙唧，橫掂有時間，咪填下囉。
錯誤就係因為呢張問卷而開始……
話說回來當有人係街叫你填問卷真係唔好亂填，就算佢係果ｄ非牟利組織話叫你幫助世界另外一端既國家或者點點點你覺得幫到人喎好想填喎都請你停一停，諗一諗，佢叫你填問卷背後既目的係乜野。
有某ｄ可能會拎你ｄ個人資料去賣，然後成為麻ｘ煩既廣告電話／電郵推銷，所以請你三思。
當時果張問卷，就係問你：丫，你覺得你皮膚有乜野需要改善或者你唔滿意既地方呀？
話說果陣我20歲都無，正一腦筍都未生埋，咁青春，又捱夜，當然係暗瘡粉刺黑眼圈呢ｄ問題啦！
白痴如我，竟然無諗到填呢ｄ係為乜，填好左之後佢就捉左我去張問卷既負責公司度喇。
就係D字頭美容集團。
去到d sales就話：唔，見你都揀左呢ｄ問題，就介紹返呢隻乜乜乜產品比你啦。
跟住我又真係試，又真係坐係度聽佢講，又覺得都唔錯丫，跟住佢又話可以介紹埋facial比我試做 （果陣佢地門市都有得做機）
咁就約左之後去試做…話說初初買ｄ產品已經接近一千蚊，試之後佢又說你不如買埋facial格啦云云，因為當時既我覺得又需要做下facial既，咁咪比錢囉，但係原來大拿拿成7千蚊，果陣我只係靠補習維生架喳……從此我就開始左我無盡卡數既生涯
佢地銷售手法大約係咁：
- 誇大你膚質既弱點進行推銷，個人認為呢個最難抗拒，因為你會覺得ｄ弱點需要佢地幫你改善，但其實假如你有心做research睇下邊ｄ護膚品幫到你，都可以有改善架
- 逼你坐入房單對單，或二對一對「逼」你就範，你唔肯就問你「點解呀，咩問題呀？」重複又重複煩到你肯拎張卡出黎簽為止，一間房仔既形式實在係令人覺得有走唔出去既感覺，但其實腳係你自己度，你隨時都有（逃）走既權利！
- 「買上買」，同你講你早前買果個plan已經out左，宜家有個新plan，做緊優惠，好抵架喳！第二個客都無呢個優惠，之但係你拎個計數機出黎計下個「優惠」幾錢都成皮幾兩皮。
就係憑住第一點同第二點，我就已經係呢間野玩左接近10年…
藉住係度分享，希望提醒自己不能夠再有新增卡數，亦都希望如果有人同我係同一遭遇，唔好唔開心，如果筆數已經超出你可以控制既範圍，記得講比你信得過既人聽，佢地就算錢銀上幫唔到你都會可以幫你諗到方法，千祈唔好自己係度苦鬥，因為個壓力真係大到可以毀左一個人既前程。
延伸閱讀：太陽報舊聞－80後孭卡數照豪使, 美容套票誘客「買上買」或違例
0 留言